یاخشیدیر

بیر نفر اهلِوفا مین بیوفادان یاخشیدیر
بیر صداقت اهلی مین اهلِ ریادان یاخشیدیر
هانسی گولدور حُسنده سندن گؤزلدیر، سئوگیلیم
هانسی بولبول عشقده من بینوادان یاخشیدیر!
قاشلارین چرخین هلالیندان، اوزون خورشیددن
صورتین آئینهٔ گیتی نمادان یاخشیدیر
بیرداها خالین گؤزللیک آرتیریر روخسارینا
بیر غلط سؤزدور دئئمشلر، آغ قارادان یاخشیدیر
گؤزلرین صحرای چین آهولریندان دلفریب
عنبرین گیسولرین مشکِ ختادن یاخشیدیر
صحتی بیمارِ عشقین کعبهٔ کویوندا دیر
اهلِ درده خاکِ راهین طوطیادن یاخشیدیر
مین بلا طوفانی قوپسا، ذرّه گلمز عینیمه
رخنه گؤرمز هر بنا کیم ابتدادن یاخشیدیر
جاهیله تبلیغِ عرفان ائیله ملک آسان دئییل
دیدهٔ خفاش اوچون ظلمت ضیاء دن یاخشیدیر
واحدا، انصافاً دئسین تبریزده دوستوم اعتماد(١)
گنجلرده هانسی شاعیر بی ر یا(٢)دان یاخشیدر!

١شاعیر اعتماد، ٢شاعیر محمد بی ریا.