نئیله ییه بیللم؟

طالع منه یار اولماسا، من نئیله ییه بیللم؟
ذؤقونجا نیگار اولماسا، من نئیله ییه بیللم؟
بیر آهو باخیشلی گؤزله چوخدان اسیرم
آهیمله شیکار اولماسا، من نئیله ییه بیللم؟
مئیخانه ده همدم منه مئی جامی الینده
بیر لاله عذار اولماسا، من نئیله ییه بیللم؟
مردلیکله، صداقتله گؤزل دوست یولوندا
بیر جان که نثار اولماسا،من نئیله ییه بیللم؟
یوز ایل یاشاییب بیرجه گون عؤمرومده فلکدن
کامیمجه مدار اولماسا، من نئیله ییه بیللم؟
من بیر گول اوچون یالواریرام خاره همیشه
گولدن او کنار اولماسا، من نئیله ییه بیللم؟
مهپاره‌لرین جؤرونو چکمک لیگه، واحد
کؤنلومده قرار اولماسا، من نئیله ییه بیللم؟