کیم گؤروب، او دئسین!

صفایِ مجلیسِ جانانی کیم گؤروب، او دئسین!
بلایِ محنتِ هیجرانی کیم گؤروب، او دئسین!
اینانمرام، منه هر کیم دئییر کی جنّت وار
گؤزیله روضهٔ رضوانی کیم گؤروب، او دئسین!
منیم گولوم، چیچگیم، جنّتیم، گؤزللردیر
بهشتی، حوری و قیلمانی کیم گؤروب، او دئسین!
کمندِ عشقده، مجنونو گؤرمه یه ن، نه بیلیر؟
اسیرِ زولف پریشانی کیم گؤروب، او دئسین!
من آغلادیقجا نیگاریم، گولردی گؤز یاشیما
گولرکن، اول گولِ خندانی، کیم گؤروب، او دئسین!
چمنده هر سحر عشق اهلینین ترانه سی وار
فغان بولبول نالانی کیم گؤروب، او دئسین!
منیمده، واحد، اؤز ایستکلیمین گؤزللیگـدر(١)
باهار زمانی گولوستانی کیم گؤروب، او دئسین!

١مصرع بو شکلیده ده قئید اولموشدور:
منیمده، واحد، اؤز ایستکلیمین گؤزل لیگینی