منو
دونیا گولسون!
گؤستر، ای گول، ازونو بولبولِ شیدا گولسون
گؤزلرین شؤقی ایله نرگیسِ شهلا گولسون
چیخ چمن سئیرینه، بو حُسن ایله، بو قامت ایله
گول سئوینسین، گؤزلیم، سروِ دل آرا گولسون
آچ، داغئت، ناز ایله، لیلا کیمی زولفون اوزونه
دردلی عاشیق لرینین عشقینه صحرا گولسون
گزمه بوندان بئله بیگانه ایله، قورخوم اودور
بی وفا سؤیله‌ییب عالم سنه، دونیا گولسون
سئوگیلیم، ایندی جسارت گونو، مردلیک گونودور
قویما اؤز عاشیقینه هر یئتن ادنا گولسون!
آغلاماق عشقده، عاشیقلر ایچون نقصاندیر
کی، گرک یوسفین عشقینده زولیخا گولسون
واحد عاشق ایسه، مجنونه دئیین آغلاماسین
گَلسین ائتسین، بو گؤزل شوخا تماشا گولسون