منو
فرصت اولمادی!
گَلدیم وصالِ یاره یئته م، فرصت اولمادی
بیردم دویونجا صحبت ائدم، قسمت اولمادی
جؤورون چکیب همیشه بو زلفو قاره لرین
دیوانه کؤنلومه یئنه بیر عبرت اولمادی
جنّت دی مجلیسیم ائیله کی، گَلدی دون رغیب
مجلیس جهنم اولدو، منه جنّت اولمادی
آز اولسا، باده نین چوخ اولور روحه لذّتی
حدّیندن آرتیق اولسا، بو بیر لذّت اولمادی
سرویم، دیئنده سانما، قیامتدی قامتین
محشر کی قوپمادی. سنه بیر تهمت اولمادی
فرهادی فضلِ صنعتی سئودیردی شیرینه
شیرینی عشقه جزب ائله ین صورت اولمادی
عشقینده اؤلمک حسرتی اؤلدیردو واحدی
چوخ یاخشی اولدو. ایسته گینه حسرت اولمادی