نئچه قوربان دئمیشم!

گٔؤزلرین قاره سینه بیر نیچه قوربان دئمیشم
قاشلارین طاقینه قوربان یرینه جان دئمیشم
رازِ پنهانیمی خلق ایچره منیم فاش ائله دین
بیوفا، من که سنه سیرّیمی پنهان دئمیشم
خوبلار جمله گدادیر سرِ کویوندا سنون
سنه بو خوبلار ایچره مه تابان دئمیشم(١)
مور وار اول خط و خالین گؤره لی رویوندا
او سبب دن اوزونه مهرِ درخشان دئمیشم
قاشینا تیغ دئدیم، قانیمی توکمک نه اوچون
توت کی، ظالیم، نولا، بو باره ده بهتان دئمیشم
اینجییوب چیخسا سینه مدن، یئری وار، پیکانین
کی، نئچین باغریما گلدیکجه باسیب، جان، دئمیشم
واحدم، قویمایین، اؤلدوردو او مهپاره منی
سهو ائدوب گول اوزونه مهرِ درخشان دئمیشم(٢)

مصرع بو شکلیده ده قئید اولموشدور:
١سنه بو خوبلار ایچره شهِ خوبان دئمیشم .
٢سهو ائدوب گول اوزونه من مهِ تابان دئمیشم.