هوشیار اولان یئره!

ای نامه، تئز یئتیر اؤزونو یار اولان یئره
بولبولدن عرضِ حال ایله، گولزار اولان یئره
اؤز نازنین طبیبینه دیٔ گیزلی دردینی
قویما نیگاری یول تاپا اغیار اولان یئره
بیگانه دن چتیندیر آییرماق گؤزللری
ممکن دئییل کی، گئتمه یه گول خار اولان یئره
چوخداندیر، آرزو ائدیرم بیر گؤره م سیزی
کؤنلوم اوُچور همیشه وفادار اولان یئره
بیر واخت سن اسیری ایدین نازلی بیر گولون
هئچ بیر یولون دوشمور او دلدار اولان یئره
باری وفاسیز اولما اونا، سن وفالی اول
هردن سفارش ائیله او سردار اولان یئره
جانان وفاسیز اولسادا، ال چکمک اولماییر
قوُش مئیل ائدر همیشه گرفتار اولان یئره
سن یاز کامال معلمه(١)، بیز عشق مستی ییک
بیزدن قاچیرسا، گئتسین او هوشیار اولان یئره
بیر آهو گؤزلو واحدی حئیران ائدیب یئنه
گلمیش طبیب نازیله بیمار اولان یئره

١ گؤی چای بؤلوگونده امکدار معلم ایدی.