گئتدی الدن یوخ و وار

میثلِ زنجیر کئچیب گردنیمه طرهٔ یار
منه دیوانه دئییر، جمله خلایق نه کی وار
گولشنِ حُسنده بیر دام قوُروب زولفونده
قیلدی صیاد گؤزون کؤنلومو اول دامه دوچار
دهنین سیرّینه یول تاپمادیم، ای غنچه دهن
گئتدی الدن نه قدر فیکر ائله دیکجه یوخ و وار
چشمِ بیماریوی گولشنده گؤروب نرگیس، اودور
الدو کج گردنی، حئیرتله باخیر مست و خوُمار
ائیلرم ناله، سنی غئیرله گؤرسم، نئجه کیم
بولبول آغلار، گؤره، گولشنده گولون همدمی خار
غئیرلر بزمینی شمعِ روخون ائیلر رؤشن
عاشیقِ زارین ائدرسن گونونو تیره و تار
طوقِ زولفو او شهین بوینوما کئچمیش، واحد
سؤیله ییرلر منه دیوانه خلایق نه کی وار