منو
روحوم اوُچور لذّت ایچینده
مین لرجه گؤزل اولسادا هر ملّت ایچینده
اولماز سنه بنزر، گؤزلیم، خلقت ایچینده
هیجرینده نه‌لر چکدیگیمی، وصلینه یئتسم
بیر بیر سنه عرض ایئله یرم صحبت ایچینده
اول زولفِ پریشانه او گوندن کی، اسیرم
مجنون دئییلر آدیما جمعّیت ایچینده
کویوندا صفا چکمگه یول وئرمه رقیبه
یوخدور یئری خاین آدامین جنّت ایچینده
بیگانه سؤزون آچما منه، غصه دن اؤللم
بیماره ایچیرتمه زهری شربت ایچینده
مین جاذبه واردیر، گؤزلیم، مست گؤزونده
انسان سنه باخدیقجا قالیر حئیرت ایچینده
و احد، منی هر دم کی گؤروب دیندیریر اول شوخ
کؤنلوم آچیلیر، روحوم اوُچور لذّت ایچینده