مین گؤزل گؤردومسه، بیر اهلِ وفاسین گؤرمه دیم!
چوخ جفا چکدیم بو یولدا، بیر صفاسین گؤرمهدیم
اوزدوم ال بیگانه خصلت آشنالاردان، کؤنول
من بو دونیانین حقیقی آشناسین گؤرمهدیم
انتهایه گئتدی عؤمروم انتظارِ وصل ایله
محنت و درد و فغانین انتهاسین گؤرمهدیم
نئی کیمی فریادیما گؤز یومدولار همدملریم
بیر اؤزوم تک، اهلِ عشقین بینواسین گؤرمهدیم
خئیرخواهی اولدوغوم بدخواهیم اولدو عاقبت
هر کیمی محرم خیال ائتدیم، اداسین گؤرمهدیم
عشقدیر باقی ائدن لیلی له مجنون نامینی
من کئچن عاشیقلرین هر گز فناسین گؤرمهدیم
واحدی، من اهلِ انصافم، نئجه گؤزدن سالیم؟
باشقالارتک من اونون بیر ادعاسین گؤرمهدیم