منو
آیریلدین!
نئیله‌دیم مندن، ای سروِروان،آیریلدین
ائیله دین گولشنِ عؤمرومو خزان،آیریلدین
سجده ائیلردیم او طاقِ قاشینا صبح و مسا
ائیله دین قدّیمی هیجرینده کمان، آیریلدین
آغلارام روز و شب، ای غنچه دهن، بولبول تک
قویدون هیجرینده دلِ زاریما قان، آیریلدین
منی فرهاد صفت، کوهِ غمه ائتدین اسیر
مندن اول گون کی، سن، ای شهد زبان، آیریلدین
آتشِ هیجرینه اؤز عاشیقینی یاندیردین
یئتمه‌میش وصلینه، ای مونسِ جان، آیریلدین
خوبلار ایچره سنی اهلِوفا بیلمیش ایدیم
بی وفا اولماغینی ائتدین عیان، آیریلدین
واحدِ غمزده یم، آغلاماق عادتدی منه
شاهیدیم وار بو سؤزه، اشکِ روان، آیریلدین