شربت وصل

پرتو آلمیش مهرِ روییندن گؤی اوزره ماهتاب
اول سبب پر نور اولوب، اوزدن گؤتورموشدور نقاب
زولفودورمی؟، عارضین توتموش سراسر، بیلمزم
یا گؤی اوزره عارضِ خورشیدی توتموشدور سحاب؟!
دم به دم آهو گؤزوندور، قارشی دوُرموش چشمیله
بو عجب دیر، صید، صیادیندان ائتمز اجتناب
هر زمان پیکانلارین سوراخ ائیلر جسمیمی
ائیله مز مشگانلاریندان جسمیم اولدور اضطراب
دایماً، ای غنچه لب، آغیاره قیلدین لطفلر
آتش عشقینده، عشق اهلینی قیلدین کباب
تشنه دیر واحد شراب عشقینه، مدتدی کیم
شربت وصلیندن، ای گول، قیل اونو بیر کامیاب