منو
بس نه دئییم؟
من اول شوخه گولِ رعنا دئمه ییم، بس نه دئییم؟
عاشیقه بولبولِ شیدا دئمه ییم، بس نه دئییم؟
مین گؤزل گؤرسه گؤزوم، بیر کره دویماز کؤنلوم
بو کیچیک قطره یه دریا دئمه ییم، بس نه دئییم؟
من ا گر عشقده مجنون دئییلم، بس نه چییم؟
سئودیگیم دلبره لیلا دئمه ییم، بس نه دئییم؟
چیرپینیر قوش کیمی هر زولفونو گؤردوکجه کؤنول
من بو دیوانه یه رسوا دئمه ییم، بس نه دئییم؟
گؤزلرین حسرتینی چکمه ین عاشیق یوخدور
سنه من آفتِ دونیا دئمه ییم، بس نه دئییم؟
بو شیرین لیک، بو لطافت کی، سنین وار، گؤزلیم
سنه گولدن ده من اعلا دئمه ییم، بس نه دئییم؟
عشقدن بیر بو قدر سؤیله مک اولماز، واحد
من بو مجنونلوغا سئودا دئمه ییم، بس نه دئییم؟