عقل و کمال ایسته ییرم!

من اؤز نیگاریمین حُسن و جمالین ایسته ییرم
فراقینا یانیرامسا، وصالین ایسته ییرم
عموم عالم او شوخون سئویرسه گول اوزونو
من ایسه زولف لرین، قارا خالین ایسته ییرم
گؤزللیک عاشیقی چوخلار اولوبدور عالمده
من اؤز نیگاریمین عقل و کمالین ایسته ییرم
اؤزوم کیمی هانی عاشیق کی، اهلِ حال اولسون؟
گؤزللرین من اودور، اهلِ حالین ایسته ییرم
من ایندی عصریمیزین اولسام دا مجنونو
گؤزللرین یئنه لیلی میثالین ایسته ییرم
منیم خیالیم اودور، جان وئریم او نازلی گوله
بو باره ده من اونون دا خیالین ایسته ییرم
گؤره نده دایم او گول چهره نی فرحله نیرم
اؤزومکودور یئنه، جاه و جلالین ایسته ییرم
منی فراق ایله واحد، او تلخ کام ائده نین
بوساطِ وصلده شیرین مقالین ایسته ییرم