منو
گؤزلیم سنده بشرسن!
بیر گُون گؤزلیم، قبریمین اوسته ن اؤتوشرسن
دردیندن اؤله ن عاشیقینی باشه دوشرسن
ائتمز، ملک اولسا، بو قدر ناز کریشمه
انصافه یاخینلاش، گؤزلیم سنده بشرسن(١)
ناز ایله گَلرکن قدمین قوی گؤزوم اوسته
قویما قورو ئیر اوستونه، بیردن سوروشرسن
بیگانه ایله گزمه، دئدیم، قلبینه دگدی
جانان، نه بیلیم، سن بو قدر دگمه دوشرسن؟
بیر سالمادین اؤز عاشقینی یادینا ظالیم!
اغیار ایله آمّا، گئدیب هر گون اؤپوشرسن
ال چک، منه ای دل، دئمه زولفوندن او ماهین
بیر گون بو کمنده سن اؤزون ده ایلیشرسن
رحم ائیله‌مه‌دین واحده، ظالیم دیریلیکده
اؤلدوکده، مزاریمله گئدرسن، گوروشرسن
١بیت بو شکلیده ده قئید اولموشدور:
ائتمز، ملک اولسا، بو قدر نازایله غمزه
انصافه ائله باری، گؤزه لیم سنده بشرسن