نه بیلیم!

بیر گول عشقینده کؤنول قان اولاجاقمیش نه بیلیم!
بولبول آسا ایشیم افغان اولاجاقمیش نه بیلیم!
وصلینی سئومز ایدیم، هیجر غمین بیلسه ایدیم
قسمتیم آخیری، هیجران اولاجاقمیش نه بیلیم!
بو قدر عشق اودونا یانماز ایدیم عالمده
جیگریم هیجرله سوزان اولاجاقمیش نه بیلیم!
خانهٔ کؤنلومو ییخدین بو ستم داشی ایله
مولکِ دل بیر بئله ویران اولاجاقمیش نه بیلیم!
یار نظر ائتمیش ایدی، بوسه وئریب، جانیم آلا
او جفاپیشه پئشیمان اولاجاقمیش نه بیلیم!
کؤنلومو خالینا بند ائتدی زنخدان ایچره
یوسیفیم بستهٔ زندان اولاجاقمیش نه بیلیم!
واحد، اول ماه روخون زولفونه دل وئرمز ایدیم
خاطریم بؤیله پریشان اولاجاقمیش، نه بیلیم!