پروانه ایله

گؤزلیم توتما برابر منی پروانه ایله
او ا گر شمعه یانیر من رُخ جانانه ایله
قورخورام، ائل دوشوب آردینجا اولا حئیرانین
احتیاط ایله داغیت زولفون اوزه شانه ایله
بوندان آرتیق غمی هیجرانینا تابیم یوخدر
اؤلرم بیرده گؤره م گر سنی بیگانه ایله
بو قدر گؤز گؤره زولفونده اسیر اولماز ایدیم
ممکن اولسایدی باجارماق دل دیوانه ایله
من دورار کن، ئینه ائل صحبت مجنون ائله یر(١)
نه زماندیر، گئچیریر عؤمرونو افسانه ایله
توبهٔ جامین نئجه سندیرمایم انصافیم وار؟
دلبریم ساقی اولوب، مئی وئره پیمانه ایله
من ا گر باده نی ترک ائیلمه سیدیم، واحد
چورویوب محو اولاجاقدیم رهِ میخانه ایله

١بعضی نسخه لرده،بئله یازیلوبدور:
من دورار کن، ئینه ائل صحبت مجنونه اوُیور.