وفاسینا باخ

گولون فداسی اولان بولبولون نواسینا باخ
عذارِ یاری سئون عاشیقین صفاسینا باخ!
لبِ نیگاریم ایله چمنده گول بحث ائله ییر
نه شرم ائدیب قیزاریر، بیر اونون حیاسینا باخ!
آلایدی جانیمی، خوشدور، گول اوزلو جانانیم
رقیب قوی دئمه سین، عاشیقین وفاسینا باخ!
اسیر فرقتییم بیر نیگارِ گول بدنین
خیالِ وصلی ایله کؤنلومون بلاسینا باخ!
آماندیر، اوُمما وفا نازنین گؤزللردن
نه بیر وفالیسین آختار، نه بی اداسینا باخ!
ایشیق وئرن او گؤزلدیر بیزیم حیاتیمیزا
محبت عالمینین نورونا، ضیاء سینا باخ!
فرحلی اولسادا گر، زولفِ یارا باغلانما
اؤزون بیر عؤمر گرک، عؤمرونون بقاسینا باخ!
آلیشدیم اودلارا پروانه لرتک عالمده
دئدیم اؤزم اؤزومه، عشقین انتهاسینا باخ!
قدحده باده، نیگارین یانیندا، گول الده
ایتیرمه فرصتی، اؤز روحونون غذاسینا باخ!
ضیالی بیر گوله، واحد آدیله شعر یازیب
اینانماسان، اوخو هر سطرین ابتداسینا باخ!