منو
جانان اوخوسون!
گولون عشقینده گرک بولبولِ نالان اوخوسون
آشکار ائیله‌مه‌ییب دردینی، پنهان اوخوسون
موسیقی خادمی دیر بولبولِ شیدا اؤزوده
گرک عاشیقله برابر ائدیب افغان اوخوسون
عرفا اهلینه دونیادا جهنم دیر او یئر
کی، واریب عارف اولان مجلیسه نادان اوخوسون
عؤمر قیمتلی اثرلر طلب ائیلر بیزدن
علمِ اشعاری گرک یاخشی غزلخوان اوخوسون
بورجوموزدور، وطن هر ساحه ده امر ائتسه بیزه
قویمایین تربیه سیز کیمسه نی هذیان اوخوسون
ان گؤزل نغمهٔ داوودو دوشونمز جاهیل
بو موغاماتی گرک علملی انسان اوخوسون
ایکی دونیادان او بیر ثانیه آرتیقدیر، ا گر
عاشیقین غملی گؤروب نازایله جانان اوخوسون
بیلمه ین شخصه نه وار عارضِ جاناندا، گرک
مکتبِ عشقده اوّلجه ((گولوستان)) اوخوسون
قاراباغدیر بیزیم اؤز اؤلکه میزین شیرازی
قوی بو تاریخی حقیقت لری هریان اوخوسون
هر ضیافتده بیزیم عادتیمیزدیر، واحد
قیز، گلین شادلیق ایله اویناسین، اوغلان اوخوسون