منو
بیر یارایدی، بیرمن!
گولشنده ایدیم سئیرده، بیر یارایدی، بیر من
بیر بولبول ایدی، بیرده چمنزارایدی، بیر من
هر عاشیق اؤز ایستکلسی عشقینده یانیردی
پروانه ایدی شمعِ شبِ تارایدی، بیر من
بولبول گوله، گول بولبوله مین ناز ائله ییردی
بیر کس یوخ ایدی، اول گولِ بی خارایدی، بیر من
گؤیلرده حسددن بیزه باخدیقجا یانیردی
دؤره مده گزن ثابت و سیارایدی، بیر من
گؤرسه یدی، رقیبین گؤزو غمدن چیخاجاقدی
من مست ایدیم، اول گؤزلری خومّارایدی، بیر من
بیر چشمه کناریدی، قدح لاله تک الده
جانان اؤزو ساقی، مئیِ گولنارایدی، بیر من
اؤز سیرّیمی اغیاره نه یاخشی دئمه‌میشدیم
دوشدو ائله بیر یئرده کی، اغیارایدی، بیر من
واحد، یانیرام خاطیره گلدیکجه بو عالم
گولشنده ایدیم سیئرده، بیر یارایدی، بیر من