جان ایسته ییرم!

گولدن آرتیق سنی ای، جسمیمه جان، ایسته ییرم!
گونده یوز یول ائده سن باغریمی قان، ایسته ییرم
آشکار آغلاسام هیجرینده، گولر، بیگانه!
خلقدن من سنی کؤنلومده نهان، ایسته ییرم
اینجیمه، گر سنی اوّلده دئدیم، ایسته میرم
قیلمادیم سیرّیمی اغیاره عیان، ایسته ییرم
آیریلیق دردی قوجالدیب منی، غمدن اؤلورم
ئینه ده من سنی، ای تازه جاوان، ایسته ییرم
نه اولور، بیرده آلایدیم ئینه آغوشه سنی(١)
بئله بیر فرصتی چوخ خیلی زمان ایسته ییرم
گول کیمی بیر دفعه اؤپمکله قزارتدیم اوزونو(٢)
دئمه، گل منده اؤپوم کی، قانا قان ایسته ییرم
واحدین قلبینی اینجیتمه، سینار شاعردیر
جاندان آرتیق سنی، ای غنچه دهان، ایسته ییرم

مصرع بو شکلیده ده قئید اولموشدور:
١نه اولا، بیرده گؤره یدیم سنی یانیمدا گؤزل .
٢ گول کیمی بیر دفعه اؤپمکله قیزارمیش یاناغین.