منو
بایرام نغمه سی
گوز آچماقا بیر لحظه ناقون وئرمه‌دی فرصت
افسوس بو ایل اولمادی بایرام بیزه قسمت
گئچمیشده کیمین واردی منیم کیمی جلالی؟
شأن و شرفی حرمتی هم دولتی مالی
بایرامدا دوزلدردیم هر ایل مجلس عالی
احوالیما ایندی یانیرام گئچمیشه نسبت
افسوس بو ایل اولمادی بایرام بیزه قسمت
مملو ایدی سفره م علمادن نجبادن
گوندوز گئجه سر گرم ایدیک هر ذوق صفادن
گورمز دیک اثر مجلسمیزده فقرادن
دولموشدی بوتون مجلسمه صاحب ثروت
افسوس بو ایل اولمادی بایرام بیزه قسمت
مین شوق هوسله ائوی بایرامدا بزه ردیم
کئفین چکنی بوشقابا میز اوسته دوزردیم
گلسه یدی کاسب مجلسه حلقومون اوزردیم
دولتلی گلن وقته ائدردیم اونا حرمت
افسوس بو ایل اولمادی بایرام بیزه قسمت
امّا گوروم ایندی ائله دینسیز آداملار
حتّی بو گوزه ل بایرامی دا ائیله انکار
جمشیددن ایللرجه قالیب یعنی بو آثار
بایرام دییه بیزلرده بونی ائتمیشیک عادت
افسوس بو ایل اولمادی بایرام بیزه قسمت