بیر دنه سن!

گؤزللر ایچره سن، ای ماهِ پاره، بیر دنه سن
گؤزللرین گؤزوسن، زولفو قارا، بیر دنه سن
گون اوزلو، نازلی صنم لر دوشر قدم لرینه
بو چشمِ مست ایله، قیلسان اشاره،بیر دنه سن
سن اولماسان، منی هیجران غمی هلاک ائیلر
شکسته کؤنلومه، عالمده چاره،بیر دنه سن
زمانه اهلینه مشهورسان گؤزلیک ده
بو سیرّ گیزلی دئییل، آشکارا بیر دنه سن
رقیبی قویما یاخین وصلینه، خیانت ائدر
کی، قورخورام، سنی چکسین کنارا،بیر دنه سن
او ذؤقو! دولتِ دونیایا وئرمرم، هردن
منِ فقیره ده قیلسان اشاره،بیر دنه سن
گؤزل حیاتینی، واحد، فنایه صرف ائتمه
سنی زمانه یئتیرمز دوباره،بیر دنه سن