عصیان ائدنلر

گؤزللر، ماه پیکرلر، کؤنوللر قان ائدنلردیر
جفا رسمینده بو بی مهرلر طغیان ائدنلردیر
اومیدِ وصل ایله هر قارا زولفه پابند اولما
کی، اونلار عاشیقی سرگشتهٔ هیجران ائدنلردیر
بو مشکین طره لی، آهو باخیشلی نازنین بوتلر
فضایِ عشقده عشاقی سرگردان ائدنلردیر
او مجنونلارکی، عشق ایچره اسیرِ دامِ ذلتدیر
دمادم آروزیِ طرهٔ جانان ائدنلردیر
زولیخا عصمتینده ناز ائدن هر شوخا آلدانما!
عزیز مصری اونلار بستهٔ زندان ائدنلردیر
روخون دؤرون مسخر قیلسا خطین، اعتراض ائتمه
ملاحت مولکونه زینت وئرن، عصیان ائدنلردیر
گول اوزلو نازنین لردن جفالار چکمیشم، واحد
نئچون کی، عندلیبِ کونلومو نالان ائدنلردیر