مگر پیمبرسن؟!

گؤزون قاداسین آلیم، سن نه یاخشی دلبرسن!
دئییل خلاف، دیسه م، لیلی یه برابر سن
بو قاش، بو گوز، بو ملاحت کی، سنده وار، ای گول
غرض کی، آفتِ جانسان، نه بیلسه ن، ائیلرسن!
نه مُشک. زولفونه بنزر، نه چشمینه آهو
خطا دئییل بو، دئسم، مُشکدن معطرسن
او کفرِ زولفون الیندن محالدر قوُتارام
کی، ذره رحم یوخوندور، سن ائیله کافر سن؟
وئریر حیات منه دم به دم لبین ذکری
سنه فدا من اولوم، سن مگر پیمبر سن؟
بشر دئسم سنه، اولماز بشر بو صورتده!
پری دیسه م ده، خطادیر، و لیک دیگرسن!
بو نوع ایله سنین هیجران اودینا تابین وار
گوره ن دئیر، سنی واحد، کی سن سمندرسن(١)

١بیت بو شکلیده ده قئید اولموشدور:
سنین کی آتشِ هیجرانا بؤیله تابین وار
گوره ن دئیر، سنه واحد، یقین سمندرسن