منو
قوی عالم اینانسین
گؤستر، گؤزلیم، گول اوزونو گؤرسون اوتانسین
پروانه سوراغیندا گزیب اودلارا یانسین
بسدیر، بو قدر مست گؤزون فتنه تؤره تدی
باخما منه چوخ ناز یله، قوی فتنه دایانسین
زولفون عجب آهسته یاتیب تر سینه ن اوسته
ترپنمه، خطا باش وئره جک، قویما اویانسین
کؤنلوم ده نه لروار سنه، نئیلیم، دئمک اولمور
یوخ بیر ائله حال اهلی دئییم، دردیمی قانسین
جنّت کی دئییرلر، اونا بیر کیمسه اینانماز
سن گؤستر او گول چهره نی، قوی عالم اینانسین
بختیم کیمی بیگانه‌لرین عومرو گؤده لسین
ای گول، تکی عالمده سنون زولفون اوزانسین
چوخدان او قارا گؤزلرینین حسرتییم من
آلسین، گؤزلیم، جانیمی چوخ قویما یوبانسین
نئیلیب سنه بیلمم بو فلاکت زده کونلوم
بیچاره نی بیر قویمادون،آسوده دولانسین
واحد، دئمه، عشقینده جفا چکدیم اوشوخون
تاپ بیر ائله عاشیق کی بو سوداده قازانسین