آذربایجان گؤزلی

گؤزلیم، گؤزلرینین صحبتی هر یاندا اولور
بو ملاحتلی باخیشلار قوُزو، جئیراندا اولور
بیر علاج ائت منه، ایستکلی طبیبیم سنسن
عاشیقین چاره سی اؤز سئودیگی جاناندا اولور
بولبول ایستر گولی، طوطی شکری، من ده سنی
عشق سئوداسی بو اوچ عاشیقِ نالاندا اولور
نه طبیعت گؤروب عؤمرونده، نه دونیا یئتیریب
او گؤزللر کی، بیزیم آذربایجاندا اولور
گول ا گر بولبولو اینجیتسه، وفاسیز دیمه یین!
قیزلارین تقصیری اولماز، گناه اوغلاندا اولور
بو گوزه للیک کی سنین وار، گؤزلیم انصافاً
نه ملک ده، نه پری ده، نه ده انساندا اولور
مبتلا کؤنلومه بیلمم، نه اولوب، هر گون ایتیر
آختاریرکن یئنه اول زولفِ پریشاندا اولور
واحدین بللی دئییل مسکنی پروانه کیمی
گاه شمعه دولانیر، گاهی گولستاندا اولور