نورِ حق تجلی ائیلر

گؤزلیم، گول اوزونه کیم کی، تاماشا ائیلر
قورخورام، عشقیمیزین سیرّینی افشا ائیلر
کج نمالار سنه معنا وئریر اؤز قلبی کیمی
قلبی صافلار سنی دوزگون یولا معنا ائیلر
یوزمین عاشیق گله، میندن بیری مجنون اولماز
یئنه مجنونونو تعیین اؤزو لیلا ائیلر
بو جفالار کی، منه دلبرِ مه رولر ائدیر
جمله سین توپلاسالار بیر یئره، دونیا ائیلر
دویدیم آخیرکی، رقیبین منه خاین لیگینی
او منیم ایسته دیگیم یاری تمنا ائیلر
عشق سئوداسینا کیم دوشسه بلالر چکه جک
شیخِ صنعان اولا گر، عشق اونو رسوا ائیلر
قورخما، واحد، هرنه ائیلرسه ده بیگانه سنه
نورِ حق، ظلمت اولان یئرده تجلی ائیلر