منو
صداقتلی جوانلار چوخدور
گؤزلیم، گول اوزونه عاشیق اولانلار چوخدور
شمع تک آتش عشقینده یانانلار چوخدور
باخما مین ناز ایله، اینجیتمه منی، قورخوم اودور
کی، دوشر فتنه، بو ایهامی قانانلار چوخدور
سانما، بیر سنسن آلان ناز ایله جان عاشیقدن
گونده یوز عشوه ایله جانیم آلانلار چوخدور
جنّته، حوری و قیلمانا اینانمازدیم ازل
گؤردوم، ای گول، سنی بیلدیم، اینانانلار چوخدور
ایندی گئت، سن اوزونه لایق اولان بولبولو تاپ
گزمه هر کسله، صداقتلی جوانلار چوخدور
باشقا بیر عاشیقی واردیر، دئسه‌لر عاشیقینین
باخما، بیگانه‌لر ایچره بو یالانلار چوخدور
واحد، هر بیر گولون آردینجا دوشوب یالواردیم
یوُردوموزدا جان آلان سئوگیلی جانلار چوخدور