وطنین آذربایجاندی سنین!

گؤزلیم، گول اوزونه ائل، هامی حئیراندی سنین
فتنه کار، شوخ باخیشین عشوه لی جئیراندی سنین
منی بیمار ائله دین گؤزلرینین حسرتی دیر
لبلرین خسته اولان کؤنلومه درماندی سنین
سن گولرکن سئوینیر، شاد اولور ائللرده گولور
مگر اول لعلِ لبین غنجهٔ خنداندی سنین؟
گؤزلرین غارت ائدیب کؤنلومو، جانیم، قالمیش
اوداکی قاشلارینین طاقینا قورباندی سنین
ارکویونسن، نه بیلیرسن، ائله اؤز عاشیقینه
هر نه حؤ کم ائیله سن، حؤ کمون ده فیراواندی سنین
بو ملاحتله ا گر بیلمه یه سن اؤز قیمتینی
نازنینیم، ملگیم، شأنینه نقصاندی سنین
قیرمیزی آلما کیمی لاله یاناغین قیزاریب
گول جمالین، ائله بیل، باغِ گولوستاندی سنین
نه کؤنول دویدو، نه گؤز گول اوزونه باخماقدان
ائیله کی، عکسِ روخون دقته شایاندی سنین
دئمه، واحد، یانیرام، عشق اودونا تابیم وار
چونکی دوغما وطنین، آذربایجاندی سنین