عبث دئییل درِ مئیخانه نی مقام ائلهدیم
نه یاردان کئچه بیلدیم، نه ترکِ جام ائلهدیم
الین، آیاغین اؤپردیم گول اوزلو ساقیلرین
ادبله ایچمگه هر یئرده احترام ائلهدیم
وصالِ شؤقی ایله اولدوم هیجردن غافل
بوش آرزولارا اویدوم، خیالِ خاام ائلهدیم
وفاسیزی سئوه نن خوش حیاتی اولماز ایمیش
بو بیوفالار اوچون عؤمرومو تامام ائلهدیم
حیاتیمی باجارا بیلمهدیم نظاما سالام
اؤز احتیاجیمی اولدوقجا بی نظام ائلهدیم
بو قارا گؤزلولرین زولفونه اسیر اولدوم
نه گوندوزوم گونوز اولدو، نه شامی شام ائلهدیم
منیم یئریمده رقیبیم اولایدی، اؤلموشدو
بو درد و محنته من ایدیم یئنه دوام ائلهدیم
سئویملی دلبریمه قورخا قورخا یالواردیم
گؤزل دقیقهلری گؤز گؤره حرام ائلهدیم
بیر آهو گؤزلویه، واحد، هاچاندی حسرت ایدیم
اؤلوم ـ ظولوم، اونو آخیر کمنده رام ائلهدیم