یاراشماز گؤزلیم!

عجب اولدو، گؤزلیم، اوُیمادین اغیارلارا،
لایق اولماز گول ا گر همدم اولا خارلارا
زولفِ زنجیرینه بیر کیمسه گرفتار اولماز
ا گر ائتمزسه هوس طرهٔ طرارلارا
بو ملاحت، بو لطافتله یاراشماز، گؤزلیم
باخاسان، بیر گول ایکن بعضی دل آزارلارا
عندلیبین نه قدر باغرینی قان ائتسه ده گول
یئنه تاثیر ائده جک ناله سی گولزارلارا
بو سببدن بوتون عشق اهلی سئویر صنعانی
غارت ائتدیردی او اؤز دینینی زنارلارا
یاره جان وئرمه ین عاشیق نئجه مقصوده یئتر؟
نییه بس عشقده پروانه یانیر نارلارا
نازِ غمزه ایله قارا گؤزلولر اؤلدوردو منی
کیم بو تحصیلی وئریبدیر بو خطا کارلارا
دورّدور قیمتی ان یاخشی کلامین، واحد
سن ده بو شعرینی صرف ائیله خریدارلارا