چوخ صفاسی وار

گرچی محبت عالمینین چوخ صفاسی وار
هر قارا زولفه مئیل ائده نین مین بلاسی وار
عاشیق شکایت ائیله مز هر جؤره صبر ائدر
پروانه سانما، آتشه یانسا، نواسی وار
هر آشنایا سئویلمک اولماز، وفاسی یوخ
چک امتحانا بلکه، بیر اهلِ وفاسی وار
قویما قدم، دیارِ محبت بلالی دیر
نه ابتداسی وار، نه ده کی، انتهاسی وار
صبریله گون گئچیرده گرک اهلِ عشق اولان
هر درد اولورسا، آخیری بیر گون دواسی وار
بیر داش اورکلی دلبره چوخدان وورولموشام
نه رحمی وار، نه دوستلوغو وار، نه اداسی وار
شاعیرلر ایچره سانما، هنرسیز واحدی
واحد نه اولسادا! یئنه بیر ادعاسی وار!