منو
هوشیار اولدون!
منی آتدین، گؤزلیم، اؤزگه لره یار اولدون
نئیله‌میشدیم، منه یار اولمادین، اغیار اولدون؟
بیوفا اولمایاسان، سن منه سؤز وئرمیش ایدین
نییه بیگانه یه آخیردا وفادار اولدون؟
من کی هر محنته قاتلاشمیشام عشقونده سنین
نه سببدن منه سن بیر گول ایکن خار اولدون؟
هانی اول عهده وفا ائیله دیگین گونلریمیز
نییه اغیار کمندینه گرفتار اولدون؟
مین جفا ائیله یه سن، من یئنه عشقیمده وارام
منه، هرچند، ازلدن ده جفا کار اولدون
حئیف او زحمتلره، من چکمیشم عشقینده سنین
فیکر ائدیردیم منه سن، بلکه ده، غمخوار اولدون
اؤزون آخیردا پشیمان اولاجاقسان، بیلیرم
منه رحمین دگیشیب، بلکه، طرفدار اولدون
واحدم، مین بو قدر جؤر ائده سن، من دؤزرم
مستسن، گئت هله سن، بلکه ده، هوشیار اولدون؟