منو
فضولی دن تخمیس
١
دیار عشقه سلطانم، بلالر چوخ چکیب باشیم
جلال شؤ کتیم غمدیر، هجوم درد فراشیم
عؤمورلردیر آخیر کویونده یارین قانلی گؤزیاشیم
((دئییلسن چوخدان، ای گردون، جهان سئیرینده یولداشیم
نولا خم اولسا قدین، سندن آرتیقدیر منیم یاشیم))
٢
خیال ائیلر گؤره ن، بیر بولبول گولزارِ عشق ایچره
یاخار گولزاری نالم آه آتشزار عشق ایچره
منی سئودای حسرتدیر ییخان آزارِ عشق ایچره
(( ترازویِ عیارِ محنتِ بازارم عشق ایچره
گوزوم هردم دولوب، مین داشه هر ساعت دگر باشیم))
٣
گؤروب روسوالیغیم، عشقینده یارین، طعن ائدر هر کیم
بلالر چکمگه گویا منی چرخ ائیله‌میش تحکیم
فلکدن باشیما داشلار یاغار، قیلماق دیلر ترکیم
(( سرشکیم آل، باغریم پاره، بیر کوهِ بلایم کیم
همیشه لاله و لعل ایله رنگیندیر ایچیم، داشیم))
۴
حیاتی عاشیقین عشق اولماسا، افسانه بیر رؤیا
محبّتدیر فقط پشمرده‌لر قلبین ائدن احیا
منی عاشیق دوغوب، قوینوندا یالنیز بسله‌میش دونیا
(( منه مانندِ بیر دیوانه صورت باغلاماز گویا
قلم سیندیردی تصویریم چکندن سونرا نقّاشیم))
۵
سئوینجی کؤنلومون یار ائتدیگی قهر و غضبدندیر
وفاده ثابت اولماق عاشیقه، اصل نسبدندیر
جفایه دؤزمه مک، واحد، دئمه، رسم ادبدندیر
(( فضولی، خازنِ گنج وفایم، اول سببدندیر
گؤهرلر تؤ کدو اسراف ایله بو چشمِ گؤهرپاشیم))