من اولمادیم!

ای گول، نه اولدو کی، سنه همدم من اولمادیم؟
بیگانه اولدو وصلینه محرم، من اولمادیم؟
مین جنّت ایله بیر قارا خالی دگیشمرم
باغِ بهشته یاخشی کی، آدم من اولمادیم!
واریم ـ یوخوم نه اولسا، وئره ردیم گؤزللره
خلقتده باشقا سیرّ وار، حاتم من اولمادیم
میخانه لرده کئچدی حیاتیم صفا ایله
شادم، ریایِ ذؤقده بیردم من اولمادیم
جامِ جمین شرابه وئره ردیم خزینه سین
جمشیده خدمت ائتمک اوچون جم من اولمادیم
شؤقِ محبته دوشه نین مین بلاسی وار
صد شوکر، اؤزگه ذؤقه مسلم من اولمادیم!
واحد، رقیب خرم اولوب وصلِ یارایله
هیجران اسیری سن، دئمه، خرّم من اولمادیم