ایسته میرم!

گئت، گولوم، گئت منه سن جان اولاسان، ایسته میرم
عشوه لی، سئوگیلی، جانان اولاسان، ایسته میرم!
بیرده گؤز یاشی تؤ کوب، کویونا گَلمم گؤزلیم
گؤروب احوالیمی خندان اولاسان، ایسته میرم!
بی وفالیقدا بوتون عالمه مشهور اولدون
سن ا گر حوری و قیلمان اولاسان، ایسته میرم!
وورموسان سینه مه مین یاره، کفایتدی منه
بو سینیق کؤنلومه درمان اولاسان، ایسته میرم!
بی وفاسان، دئییلم راضی، اؤلندن سونرا
قبریم اوستینده نگهبان اولاسان، ایسته میرم!
پیس گونومده منی سالدون نظریندن گئتدین
یاخشی گونده منه مهمان اولاسان، ایسته میرم!
واحدین قیمتینی بیلمه‌دین اینجیتدین اونو
هله کی، اؤلدو، پشیمان اولاسان، ایسته میرم!