عجب گؤزلری وار!

هر کسین دهرده سن تک، گؤزلیم، دلبری وار
خوش اونون حالینا، دونیادا نه دردِ سری وار؟ !
قورخورام، نازایله چوخ باخما، یامان گؤز چوخدور
هر گؤره رن سؤیله ییر حسرتله: ((عجب گؤزلری وار!))
دوشون اؤز قدرینی، آلداتمایا بیگانه سنی
اللی یردن، گؤزلیم، گؤزلرینه مشتری وار
گؤزلرین بیر یانا، کیپریکلرینه حیرانم
کی، ده لیر باغریم هردن، ائله بیل نشتری وار
بیر دؤنوب باخماق ایله عالمی زنجیره سالیر
او قارا زلفونون، ای مه، نه یامان شاکر ی وار!
بؤیله بیر دامِ بلادان نئجه قورتارماق اولور؟
گؤزلرین تک، گؤزلیم ساچلارینین رهبری وار
وصله یئتجک، نه ایچون سرّینی اغیاره دئدین؟
ایندی، واحد، سنی دیندیرمه سه جانان یئری وار!