هئچ کیم بیلمه سین!

ای کؤنول، آهسته گئت گولزاره،هئچ کیم بیلمه سین
گیزلی چیخمیش سئیره اول مهپاره،هئچ کیم بیلمه سین
یار اوچون گؤزیاشی تؤ کسم، قورخورام بیلسین رقیب
ممکن اولماز، آخسا بیر فواره،هئچ کیم بیلمه سین
یاری اغیار ایله گؤرموشلر، ائشیتدیم، کیم گؤروب
همدم اولسون گول چمنده خاره،هئچ کیم بیلمه سین؟
اول قارا زولفو سئوندن گؤر نئجه دیوانه یم
گئتدیم آچدیم سیرّیمی اغیاره،هئچ کیم بیلمه سین
من نئجه گیزلین توتوم ائلدن بلاسین کؤنلومون؟
یانسا پروانه نه ممکن ناره،هئچ کیم بیلمه سین
عاجیزانه ایسته دیم، گول لب لریندن کام آلام
گلدی یوزمین ناز ایله گفتاره،هئچ کیم بیلمه سین
من گرک،واحد، دئیه ایدیم یارا گیزلین دردیمی
بلکه، یار ائتسین منه بیر چاره،هئچ کیم بیلمه سین