شادام اوندان!

ای کؤنول، دونیاده چوخ نادانی انسان ائتمیشم
جاهیلی علم و ادب شؤقیله انسان ائتمیشم
آشنالیق خاطریچین دؤزموشم هر زحمته
ال اوزوب بیگانه دن جان دوستا قوربان ائتمیشم
چوخ صداقت، مرحمت گؤسترمیشم همدردلره
عاجیزه، مظلوما دایم لطف و احسان ائتمیشم
اقربالار خئیرخواهی اولموشام عؤمروم بویو
قان ایچن ظالیملارین حالین پریشان ائتمیشم
توتموشام حؤرمتلرین عاریف اولان انسانلارین
حق سئوه نلر خاطیرین هر لحظه خندان ائتمیشم
مرحمت گؤسترمیشم قوّه م چاتینجا خالقیما
بینوالار دردینه تدبیر و درمان ائتمیشم
شادام اوندان، والدینیم راضی گئتمیش تورپاغا
احتیاجین اونلارین ساغلیقدا هر آن ائتمیشم
والدینه من ائدن حؤرمتلرین میندن بیرین
بونلار ائتمزلر منه، یوز آه و افغان ائتمیشم
یادگار اولسون، بو شعری واحده یازدیرمیشام
من اونون دا قلبینی دردیمله سوزان ائتمیشم