من دئمزدیم، سن دئدین!

ای کونول، اول شوخه جانان من دئمزدیم، سن دئدین
جان بئله جانانا قوربان من دئمزدیم، سن دئدین
کیم بیلیردی لعلِ جانانین صفابخش اولدوغون؟
بؤیله سیرّی خلقه پنهان من دئمزدیم، سن دئدین
نازایله مین جان آلان مه رولرین گول لبلرین
عاشیقین دردینه درمان من دئمزدیم، سن دئدین
مه اوزون خورشیده بنزتدیم، هیلاله قاشلارین
وار سنین فیکرینده نقصان، من دئمزدیم، سن دئدین
هر گول اوزلو دلبرین دوشمه خیالِ زولفونه
قلبینی ائیلر پریشان، من دئمزدیم، سن دئدین
عصری گؤرمور، ایندی ده جنّت تمناسیندادیر
زاهیدِ بی ذؤقه نادان من دئمزدیم، سن دئدین
زولفِ جاناندان دل اوزموش، سانکی بیر دایوانه دیر
واحدین حاقیندا بهتان من دئمزدیم، سن دئدین