گؤره ن ده

دل ناله ائدر، اوگولِ خندانی گؤره ن ده
بولبول گَلر افغانه گولوستانی گؤره ن ده
گؤرجک او گولی، لب لرینه رغبتیم آرتیر(١)
طوطی هوس ایلر، شکرستانی گؤره ن ده
زنجیری سئویر، گور نئجه دیوانهدی کونلوم
ممنون اولور اول زلف پریشانی گؤره ن ده(٢)
شاد اولسادا، وصلین ایله هر دم دلِ عاشیق
البته، دوشر محنته هیجرانی گؤره ن ده
عشق اهلنین آرتار، گؤزهلیم دردی، ملالی
اغیاریله اؤز سئودیگی جانانی گؤره ن ده
قانی قارالیر، تیره اولور گؤزلری بیردن
اؤز سئوگیلیسی بیر ایشی پنهانی گؤره ن ده
گورجک سنی عالم سئوینیر! قاش قارالاندا؟
ائللر سئوینیرلر مه تابانی گؤره ن ده
واحد، سن او گؤن دردینی یاره دییهجکدین(٣)
لال اولدی دیلین، بس نییه جانانی گؤره ن ده

بعضی نسخه لرده،بئله یازیوبدور:
١ گؤرجک او گولون لبرینی رغبتیم آرتیر.
٢مجنون اولور اول زلف پریشانی گؤره ن ده.
٣واحد، ائدیب اول شوخ سنی زولفونه بسته
دیوانه بیلر زنجیری زندانی گؤره ن ده.