منو
شمع پروانه سیز اولماز
زولفون نییه بیرآن، گؤزلیم، شانه سیز اولماز!
عادت بئله دیر عشق ائوی بیگانه سیز اولماز!
طعن ائیله‌مه، زولفوندن اوُزاقلاشماسا کؤنلوم
بیر یئرده کی زنجیراولا، دیوانه سیز اولماز!
غمدن یانیرام، رویونو گؤسترمه رقیبه
بیر شمع کی، شؤق آرتیرا، پروانه سیز اولماز!
مخمور گؤزون قویمادی بیر کؤنلومی راحت
بیردم بو ستم خانه سی مستانه سیز اولماز!
سن شؤقِ لبِ یارایله ایچ، باده ایچینده
کیمدیر دئیه، مئی مجلیسی پیمانه سیز اولماز!
بیر دلبرین عشقینده بوتون دیللره دوشدوم
هنگامه دیر، عشق عالمی، افسانه سیز اولماز!
واحد مئی ایچیر گیزلی، دئییرلردی ائشیتدیم
او رندِ خراباتی دیر، میخانه سیز اولماز!