منو
صبر قیل!
عاشیقسن، ای کؤنول، غمِ جانانه، صبر قیل
بیر باخ جفای گردشِ دؤرانه، صبر قیل
دونیایا اوُیما، فانی دیر اوضاعی عالمین
لال اول، دانیشما، هرزه و هذیانه، صبر قیل
یار اولما، سانما هر کسی گؤردوکده اهلِ دل
ناحاق یئره سالیر سنی تئز قانه، صبر قیل
هر شمع باشینا دولانیب، یانما، ای کؤنول
گؤر شمع دن چکیبدیر نه پروانه، صبر قیل
اولما طفیلی، مردسن، هر بیر گدایه کیم
عالی گداسی اول گیله، مردانه، صبر قیل
اوُیما کمندِ زولفونه بو لیلی وشلرین
اولما فضای عشقده دیوانه، صبر قیل
بالله، فنادی فعلین، ایشین، صبرین اولماسا
صبر ائتمک ایله ایش یئتر آسانه، صبر قیل
نا اهل، نانجیبه اولونجا طفیلی سن
خوشدور کی، منزیلین اولا غمخانه، صبر قیل
سیرّین همیشه ساخلا نهان، خالقا سئویله مه
فاش ائیله یر سئل کیمی هر یانه، صبر قیل
هر کیمسه نی وفالی بیلیب اولما آشنا
بیرگون اولور کی، قصد ائدر اول جانه، صبر قیل
چشمِ نیگاره، زولف و خط و خاله وئرمه دل
دامه دوچار ائدر سنی اول دانه، صبر قیل
واحد، شکایت ائیله‌مه جؤرِ نیگاردن
کافرده اولسا، تئز گلر ایمانه، صبر قیل