قارا تئل مه جماله اوسته!

تؤ کوب چین – چین، سیه زولفون، نیگاریم، مه جماله اوسته
سانیرسان سایه سالمیش ابرِ ظلمتدیر، هیلال اوسته
گؤز اوسته اوینادیر ابرولرین، مصری قلینج لارتک
مثالِ لشکرِ هیندو دؤروب جنگ و جدال اوسته
نیگاهِ توند ایله ائیلر جهانی محو سرتاسر
توتار آفاقی گردشدن، قالار امرِ محال اوسته
ملامت داشلارین چوخ آتما، سینمیش شیشه تک کونلوم(١)
نه حاجت داش آتیرسان، هیجردن سینمش سُفال اوسته
فلک ده، یا بولوت آلتندا، اؤلدوزدور خیال ائتدیم(٢)
ویا، یاریم تؤ کوب گیسولرین اول قاره خال اوسته
گهی کؤنلوم چکر جانان غمین، گه اؤزگه دن منّت
نه محنت دیر، یاغیر بو بینوانین دال با دال اوسته؟
خیالِ وصلِ دلبره یئتیرره م عؤمرومو باشه
جهاندا راضی یام، واحد، اؤلوم بؤیله خیال اوسته

مصرع بو شکلیده ده قئید اولموشدور:
١ملامت داشلارین چوخ آتما، سینمیش شیشه دیر کؤنلوم
٢فلک ده، یا بولوت آلتندا، اؤلدوزلار خیال ائتدیم