منو
هر ایکیمیز!
کؤنول، اسیر اولالی، زولفِ یاره هر ایکیمیز
او گوندن اولدوق عجب، بختی قاره هر ایکیمیز
نه غم، احاطه بیزی ائتسه اشک طوفانی
خیلاص اولوب، چیخاریق بیر کناره هر ایکیمیز
بو مه پاره‌لر عشقیدن ال چکن دئییلیک
بو یولدا اولساق ا گر پاره پاره هر ایکیمیز
منیمله عشقده، گویا کی، بولبول همدم اولوب
گلنده بیر گلیریک آه و زاره هر ایکیمیز
او اؤز گولویچون ائدیر ناله، من نیگاریم اوچون
بو نؤعو گلمیشیک آخیر قراره هر ایکیمیز
شمع ایچره یانماغی پروانه درس آلیب مندن
اودورکی، مایلیک عشق ایچره ناره هر ایکیمیز
بو عهدی ائیله‌میشم، واحد، اؤز نیگاریم ایله
چیخاندا بیرگه چیخاق لاله زاره هر ایکیمیز