بیز سیزه گلدیک!

فکرینده می، بیر گون گؤزلیم، بیز سیزه گلدیک؟
سیزدن قاییدیب، سونرا برابر بیزه گلدیک
گُولدوک و دانشدیق گئجه نی، صبح آچیلینجا
بیر غنچه گول اوستونده، سیزیمله سؤزه گلدیک
کئف چکدیگیمیز خاطره لر، وارمی یادیندا؟
گولشنده بیر آیدین گئجه ده، اوزـ اوزه گلدیک
خیلی دولانوب سئیر ائله دیک گوللر ایچینده(١)
بیرـ بیریمیزه چوخ عشوه لی، چوخ با مزه گلدیک
بیزکی، گؤزلیم، جان دئیه رک، جان ائشیده ردیک
بس ایندی نه اولدو بیزه، یوخسا گؤزه گلدیک!!
نه سنده وار اول مهر و محبت، نه ده منده
سؤندوک ایشئق اولدوز کیمی، سون منزله گلدیک(٢)
واحد، او گئچن گونلری، بیرمره اوُنوتدیق
لیکن یئنی دنیایه بیز ایندی تزه گلدیک

مصرع بو شکلیده ده قئید اولموشدور:
١خیلی دولاشیب سئیر ائله دیک گوللر ایچینده.
٢سؤندوک یانان اولدوز کیمی، سون مرکزه گلدیک.