هر زامان آغلار

فلک، بو حالِ زاریمدان منیم اهلِ جهان آغلار
فراقِ یاردا کؤنلوم ائدیب هردم فغان آغلار
گؤزومدن جاریدیر اشکیم، میثالِ چشمهٔ جیحون
دوشه بیر قطره سی عمانه، اظهار ونهان آغلار
یاماندیر عاشیقین آهی، دئییرلر امتحان اولموش
توتا بیر دفعه گر یاری، یقیناً هر زامان آغلار
تاپیلماز هئچ ده درمانی، اولار دایم گؤزو گریان
منیم تک بسترِ غمده وئریب حسرتله جان آغلار
گؤره گولشنده گر بولبول گول ایله خاری بیر یئرده
او گول خفظ ائله ییر خاری، اولونجا تا خزان آغلار
اوچوب مرغِ کؤنول تن دن، دولانیر کویِ دلبرده
چکر یارِ ستمکاره، صلایِ الامان آغلار
نیگارا، واحدی گریان قیلیبدیر جذبهٔ عشقین
ائدیبدیر سرو قدین فرقتین مثل کمان آغلار