منو
فضولینین یادگاری!
وفاسیز ائیله ین اول نازلی یاری من اؤزومم
سالان نظردن او چشمِ خوماری من اؤزومم
زامان اولور، گوله بولبولده بیوفالیق ائدیر
رقیبه مایل ائدن اول نیگاری من اؤزومم
او نازنین گؤزله چوخ جفالار ائیله‌میشم
سئویملی دلبریمین ظلمکاری من اؤزومم
من اولماسام، او گول اغیاره اعتنا ائتمز
اونا وئرن بئله بیر اختیاری من اؤزومم
وصالِ دلبره جان نقدین ائتسه‌لر قیمت
او نازنین گؤزلین جان نثاری من اؤزومم
بیزیم زمانه ده یوسیف چکیلسه بازاره
اونون بیراینجی خریداری وارسا، من اؤزومم
گئدیبسه تورپاغا مجنون، یئرینده ایندی اونون
قالان او تربتی، همده مزاری من اؤزومم
گول ازولو نازلی گؤزللرله چوخ گئچیب عؤمروم
ائلین سئویملیسی، ان بختیاری من اؤزومم
عوموم عالمه صلحون صداسی ذؤق وئریر
قالان اول آتشین ایندی شراری من اؤزومم
دئییدیم، اهلِ قلم، واحد، عفو ائدرسه منی
بؤیوک فضولی میزین یادگاری من اؤزومم