منو
غنچه نی خندان ایستر
قاشلارین تیغی، گولوم، آلماق اوچون جان ایستر
تؤ کمگه دهرده ناحاق یئره مین قان ایستر(١)
گؤزون ایستر گونومو قارا ائده شام و سحر
دایماً گؤز یاشیمی تشنهٔ عمان ایستر
تاپشیر ابرولارینا، رحم ائله سین عاشیقینه
نه دن عشاقلارین کؤنلونو بریان ایستر؟
دولانیر مرغِ کؤنول، گشت ائله ییر کویوندا
سرِ زولفونده سنین بنددیر، او، زندان ایستر
او قارا زولفونون آز چکمه‌میشم حسرتینی
مبتلا کؤنلومو هر لحظه پریشان ایستر
نه اولار، چوخدا گؤزلسن، اؤزون انصاف ائیله
هانسی گول عاشیقینی سن کیمی نالان ایستر؟
هر باخاندا، گؤزلیم، اینجیمه گول لبلرینه(٢)
بولبولون عادتیدیر، غنچه نی خندان ایستر
ببیلمه‌میشلر دهنین سیرّین هله ایندییه جن
کشف قیلماق بو معمانی چوخ ایمکان ایستر
آدام اولسایدی ا گر، کؤثری سئومزدی زاهید
لعلِ نابین کیمی بیر چشمهٔ حیوان ایستر
واحدی جاذبهٔ عشقین ائدیبدیر مجنون
یوخسا دیوانه لیگی هانسی بیر انسان ایستر؟!(٣)
١بیت بو شکلیده ده قئید اولموشدور:
گؤزلیم، گؤزلرین عشق اهلینی گریان ایستر
گونده یوزمن کیمی بیچاره نی قوُربان ایستر
٢مصراع بو شکلیده ده قئید اولموشدور:
من ده باخسام او لبِ لعلینه قان اولمازکی
٣بیت بو شکلیده ده قئید اولموشدور:
نکته بیلسین، او آداملیق هانی زاهیدلرده
لعلِ نابین وار ایکن، چشمهٔ حیوان ایستر